साँगाचोक साउन ५ गते जिल्लाको साँगाचोक गाविस- ५ का २६ वर्षीय लोकबहादुर पुरीलाई ०६७ साउन २ गते सोही ठाँउकी भतिजी नाता पर्ने १० वर्षीया एक बालिकालाई घरमा लगी जबरजस्ती बलात्कार गरेको आरोपमा प्रहरीले गिरफ्तार गरेको छ ।
घरमा पत्नी माइत गएको बेला एक्लै भएकोले साथी पठाइदिनु पर्यो भनी असार ३० गतेको बेलुका घरमा लगेर जबरजस्ती गरेको बालिकाका बुवाले बताए । भोलिपल्ट छोरीको स्वास्थ्य अवस्था नराम्रो जस्तो लागेर सोधपुछ गर्दा घटनाबारे थाहा भएको उनले बताए । सो दिन सोधपुछ र सरसल्लाहमै बितेपछि उजुरी दर्ता गर्न नपाएको उनले भने ।
असार ३२ गते चौतारा अस्पतालमा छोरीको स्वास्थ्य जाँच गराएर साउन १ गते जिल्ला प्रहरी कार्यालयमा किटानी जाहेरी दिएको बालिकाका बुवाले जनाए ।
पीडित बालिका हाल आफ्नै घरमा बसेकी छन् । बालिकाको स्वास्थ्य सामान्य भएको पीडितका बाबुले बताए । पीडक लोकबहादुर गिरीलाई भने साउन २ गते घरैबाट प्रहरीले गिरफ्तार गरी अनुसन्धानको लागि हिरासतमा राखेको जिल्ला प्रहरी कार्यालयका इन्स्पेक्टर एकनारायण कोइरालाले बताए । inseconline
