जेठ १०-१७ गतेसम्म सुनकोशी बहुमुखी क्याम्पसको स्तर
उन्नति, विषय विस्तार र
सेतीदेवी शारदा उमाविमा प्राविधिक शिक्षाको सुरुवातका लागि महायज्ञ गरिने भएको छ।
यसै विषयको सेरोफेरोमा क्याम्पस प्रमुख तथा महायज्ञ प्रचारप्रसार संयोजक रामकृष्ण
पराजुलीसँग मेरोसिन्धुका लेखनाथ नेपालले गरेको कुराकानी।
आगामी जेठ १०-१७ गतेसम्म हुन लागेको सप्ताह महायज्ञको उद्देश्य के छ ?
आगामी जेठ १०-१७ गतेसम्म हुन लागेको महायज्ञको उद्देश्य सुनकोशी बहुमुखी क्याम्पसको स्तर उन्नति विषय विस्तार र सेतीदेवी शारदा उमाविमा प्राविधिक शिक्षाको सुरुवात गर्ने हो ।
महायज्ञको तयारी कति भएको छ ?
महायज्ञको लागि २५०१ सदस्यीय मूल समारोह समिति गठन गरेका छौं । १४ वटा उपसमितिहरु गठन गरेका छौं । चैत १७ गते सम्पन्न भेलाले सप्ताह स्थल छनौट गरिसकेको छ । सप्ताह स्थल निर्माणको लागि विद्यालय व्यवस्थापन समिति र युवा स्पोर्टस् क्लब लामोसाँघुलाई जिम्मा दिइएको छ । उक्त भेलाले प्रचारप्रसारलाई व्यापक बनाउने निर्णय गरेको छ । जसमा सिन्धुपाल्चोकका सबै पत्रकारहरुलाई मूल समारोह समितिमा राखिएको छ । सिन्धुपाल्चोकबाट प्रकाशित हुने सबै पत्रिकाहरुमा वैशाख सुरुदेखि सप्ताह नसकिएसम्म प्रचार गर्नेछौं । राष्ट्रियस्तरमा टेलिभिजन स्थानीय एफएम रेडियो र केबुल नेटवर्कहरुमार्फत पनि प्रचारप्रसारलाई तीब्र बनाउनेछौं । यसका साथै पर्चा पोष्टर र माइकिङमार्फत पनि प्रचारप्रसारलाई तीब्र बनाइनेछ । सिन्धुपाल्चोक क्षेत्र नं। १ का सबै मानिसलाई यो सप्ताह कार्यक्रम हाम्रो हो भन्ने अनुभूति दिलाउने प्रयासमा हामी छौं ।
अर्थ संकलन गर्न महायज्ञ गर्ने चलन फेसनको रुपमा आएको छ अरु विकल्प छोडेर किन यसैलाई रोजिएको हो ?
नेपालीहरुको स्वभाव धार्मिक छ । उनीहरु धर्मकर्ममा बढी चासो राख्दछन् । नाम र पुण्य प्रापितका लागि सामाजिक संघसंस्थालाई दान दिने प्रवृत्तिको पनि विकास भएको छ । व्यक्तिगत रुपमा संघसंस्थालाई पैसा माग्नु भन्दा सप्ताह लगाउने र त्यसैलाई माध्यम बनाउने प्रचलनको विकास भएको छ । अहिले अर्थ संकलन गर्ने उपयुक्त उपाय नै यही देखिएको छ । पं दीनबन्धु पोखरेललाई संस्थाको हितको निमित्त ल्याउन खोजिएको हो ।
सप्ताह लगाउन सेतीदेवी शारदा उमाविलाई संलग्न गराइएको छ क्याम्पस र उमावि त फरक हो नि ?
सुनकोशी बहुमुखी क्याम्पस स्थापना गर्न सेतीदेवी शारदा उमाविको व्यवस्थापन समितिले निर्णय गरेको हो । यहाँको क्याम्पस र उमावि सँगसँगै हिँडिरहेको छ । यहाँको जनशक्ति पनि बाँडफाँड भएर प्रयोग भइरहेको छ । क्याम्पस र उमावि छुट्टाछुट्टै संगठन भए पनि आसपासका मानिसले यी दुईलाई एउटै हो भन्ने बुझेका छन् । क्याम्पसको हितमा उमावि लाग्ने र उमाविको हितमा क्याम्पस लाग्ने गरेको छ । क्याम्पस र उमावि एकअर्काका परिपुरक बनेका छन् । त्यसै भएर पनि अहिले हुन लागेको सप्ताह संयुक्त रुपमा गर्न लागिएको हो ।
सप्ताहमा विशिष्ट व्यक्तिलाई आकर्षण दिलाउने के योजना छ ?
विशिष्ट व्यक्तिलाई आकर्षण गर्न चैत १७ गते सम्पन्न भेलाले सचिवालय समिति गठन गरेको छ । उक्त सचिवालय दानवीरहरुको उचित सम्मान गर्नको लागि कार्यक्रमहरुको तय गर्नेछ । उनीहरुलाई आकर्षित गर्न विद्यालय र क्याम्पसले सम्मान गर्ने कार्यक्रम राख्नेछौं ।
सप्ताहबाट अनुमानित कति रकम संकलन गर्ने उद्देश्य छ ?
यस सप्ताहबाट तीन करोड उठाउने उद्देश्य राखेका छौं । व्यापारी समाजसेवी उच्च आर्थिक हैसियत भएका सबैलाई फुटाएर त्यस उद्देश्यलाई पूरा गर्नेछौं । यस क्षेत्र आसपासका सामान्य आर्थिक हैयित भएका प्रत्येक व्यक्तिको केही लगानी होस् भन्ने अभिप्रायले सानो रकमलाई पनि प्राथमिकता दिन्छौं । आर्थिक दानमा धेरै व्यक्तिलाई सहभागी गराउने हाम्रो उद्देश्य छ ।
सप्ताहको बारेमा थप कुरा ।
हामीले विशुद्ध सामाजिक उद्देश्यले यो सप्ताहको आयोजना गरेका छौं । यसमा सबै राजनीतिक दलको समर्थन रहेको छ । सबै राजनीतिक दलसँग सकि्रयताका साथ सहकार्यको प्रयास गर्छौं । कतिपय राजनीतिक दलका साथीहरुसँग भेट हुन बाँकी छ । उनीहरुसँग पनि सहकार्य गर्न र कसैलाई पनि छायाँमा नपार्ने हाम्रो प्रयत्न हुन्छ ।
