माघ ७ । काठमाडौ – सरकार र तराइमा सशस्त्र भूमिगत गतिविधि सञ्चालन गरिरहेको अखिल तराई मुक्ति मोर्चाबीच आज वार्ता भएको छ ।
सप्तरी जिल्ला विकास समितिको कार्यालयमा भएको वार्तामा छ बुँदे सहमति गरी मोर्चाले शान्तिपुर्ण राजनीतिमा आउन प्रतिबद्धता जनाएको बताइएको छ । सरकारी वार्ता टोलीकी संयोजक शान्ति तथा पुनर्निर्माण मन्त्री सत्य पहाडीको टोलीसँग मोर्चाका तर्फबाट उपाध्यक्ष अजित सिंह नेतृत्वको टोलीले वार्ता गरेको हो । सरकारी वार्ता टोलीमा मन्त्री पहाडीसहित गृहराज्यमन्त्री भिमलाल राजवंजी, विनाविभागीय मन्त्री राजलाल यादव तथा शान्ति मन्त्रालयका सचिब ध्रुबप्रसाद शर्मा सहभागी हुनहुन्थ्यो । समूह जयकृष्ण गोइत नेतृत्वको भनिए पनि गोइतले भने आफ्नो संगठनको सरकारसँग वार्ता गर्ने कुनै कार्यक्रम नरहेको बताएका थिए। उनले अजित सिंहलाई आफ्नो संगठनले कारबाही गरिसकेको बताएका छन् ।
